វិទ្យាស្ថានពុទ្ធសាសនា អប់រំ និង អភិវឌ្ឍន៍ ធ្វើសន្និបាតវិសាមញ្ញ

ដោយ៖ ថាច់ រតនា |សហការីនៃវិទ្យុសេរិភាពកម្ពុជាក្រោម|

កាលពីថ្ងៃទី១០ ខែកុម្ភៈ ឆ្នាំ២០១៦ វិទ្យាស្ថានពុទ្ធសាសនា អប់រំ និង អភិវឌ្ឍន៍ បានប្រារព្ធឡើងនូវមហាសន្និបាតវិសាមញ្ញរបស់ខ្លួន ដែលធ្វើឡើងនៅវត្តភ្នំពេញថ្មី ភូមិដូនបុស ឃុំចំការអណ្ដូង ស្រុកចំការលើ ខេត្តកំពង់ចាម ដើម្បីប្រកាសប្រើប្រាស់ទីស្នាក់ការថ្មី ប្រកាសសមាសភាពនៃរចនាសម្ព័ន្ធ ប្រកាសលទ្ធផលដែលសម្រេចបាន និង លើកឡើងអំពីគោលការណ៍ដើម្បីធ្វើសកម្មភាពទៅថ្ងៃខាងមុខ ។

ក្នុងអង្គមហាសន្និបាតនេះ ក្រៅពីវត្តមានសមាជិក សមាជិកា និង ថ្នាក់ដឹកនាំវិទ្យាស្ថានពុទ្ធសាសនា អប់រំ និង អភិវឌ្ឍន៍ ក៏មានការអញ្ជើញចូលរួមពីសំណាក់ ព្រះមេគណស្រុក ព្រះវិន័យធម៌ ប្រធានការិយាល័យធម្មការស្រុក អាជ្ញាធរដែនដី និង តំណាងអង្គការសមាគមខ្មែរកម្ពុជាក្រោមប្រចាំព្រះរាជាណាចក្រកម្ពុជា ព្រមទាំងក្រុមយុវជន និស្សិតផងដែរ ។

ព្រះមហាថេរ គីរីធម្មោ ប៉ាង សុដារ ប្រធានវិទ្យាស្ថានពុទ្ធសាសនា អប់រំ និង អភិវឌ្ឍន៍ ថ្លែងក្នុងមហាសន្និបាតវិសាមញ្ញ

វិទ្យាស្ថានពុទ្ធសាសនា អប់រំ និង អភិវឌ្ឍន៍ ជាអង្គការក្រៅរដ្ឋាភិបាលមួយ បានចាប់បដិសន្ធិឡើងនូវឆ្នាំ២០០១ ដែលមានសកម្មភាពទៅលើវិស័យព្រះពុទ្ធសាសនា ការងារមនុស្សធម៌ អប់រំ និង បណ្ដុះបណ្ដាល ។

ថ្លែងក្នុងមហាសន្និបាត ព្រះមហាថេរ គិរីធម្មោ ប៉ាង សុដារ ព្រះប្រធាននៃវិទ្យាស្ថានពុទ្ធសាសនាអប់រំ និង អភិវឌ្ឍន៍ បានមានសង្ឃដីកាថា ចាប់ពីបង្កើតឡើងនូវវិទ្យាស្ថានមកទល់នឹងបច្ចុប្បន្ននេះ វិទ្យាស្ថានបានចូលរួមយ៉ាងសកម្មក្នុងការអភិវឌ្ឍន៍ដល់វិស័យព្រះពុទ្ធសាសនា ជាពិសេសកសាងនូវប្រាសាទ និង កន្លែងសម្រាប់បូជាក្នុងព្រះពុទ្ធសាសនា មណ្ឌលវិបស្សនា ទូទាំងព្រះរាជាណាចក្រកម្ពុជា បោះពុម្ព និង នាំនូវព្រះត្រៃបិដកទៅប្រគេនជួនពុទ្ធសាសនិកជននៅប្រទេស ថៃឡង់ដ៍ សហរដ្ឋអាមេរិក កាណាដា អូស្ត្រាលី ។ល។ និង ដែនដីកម្ពុជាក្រោមផងដែរ ។

ព្រះអង្គបានបន្តនូវសង្ឃដីកាថា៖ ចាប់ពីឆ្នាំ២០០៥ មកដល់ពេលនេះ វិទ្យាស្ថានបានចូលរួមជាច្រើនសកម្មភាព ជាមួយនឹងរដ្ឋាភិបាលក្នុងការការពារបូរណភាពទឹកដី ជាពិសេសគឺការកសាងវត្តអារាម ព្រះពុទ្ធបដិមា តាមបណ្ដាលព្រំដែនដែលមានជម្លោះដូចជា៖ កម្ពុជា ថៃ និង កម្ពុជា យៀកណាម ។ វិទ្យាស្ថានគឺជាអង្គការដំបូងគេដែលមានសមត្ថភាព ក្នុងការនាំយកនូវស្បៀងអាហារជួនដល់កងទ័ពការពារនូវតំបន់ប្រាសាទព្រះវិហារ ។

ព្រះមហាថេរ គិរីធម្មោ ប៉ាង សុដារ ប្រសូត្រ និង បួសរៀននៅវត្តចំប៉ា ឃុំចំប៉ា ស្រុកខ្សាច់ ខេត្តឃ្លាំង ដែនដីកម្ពុជាក្រោម ។ ព្រះអង្គ គឺជាព្រះមហាថេរមួយអង្គ ក្នុងចំណោមព្រះមហាថេរខ្មែរកម្ពុជាក្រោម ។ ព្រះអង្គមានគុណបំណាច់យ៉ាងធំធេងបំផុត ចំពោះសង្គមខ្មែរក្រោមនៅកម្ពុជានិយាយដោយឡែក និង នៅកម្ពុជាក្រោមនិយាយរួម ។

ព្រះមហាថេរ គិរីធម្មោ ប៉ាង សុដារ បច្ចុប្បន្ន ជាព្រះចៅអធិការវត្តភ្នំពេញថ្មី និង ជាទីប្រឹក្សាផ្ទាល់របស់ សម្ដេចព្រះមហាសុមេធាធិបតី នន្ទ ង៉ែត ព្រះសង្ឃនាយកនៃព្រះរាជាណាចក្រកម្ពុជា ។

ដោយស្នាព្រះហស្តដ៏ធំធេងរបស់ព្រះអង្គចំពោះប្រទេសជាតិ ព្រះមហាថេរ គិរីធម្មោ ប៉ាង សុដារ បានព្រះមហាក្សត្រ និង រាជរដ្ឋាភិបាលកម្ពុជាប្រគេននូវគ្រឿងឥស្សរិយយសជាច្រើន ក្នុងនោះមានគ្រឿងឥស្សរិយយស «ជាតូបករណ៍» ដែលជាគ្រឿងឥស្សរិយយសបានប្រគេន ថ្វាយ ឬ ជួនចំពោះបុគ្គលដែលបានជួយទំនុកបម្រុងដល់ជាតិ ៕